Ginger的男友是女人。
請不要take it literally，Ginger絕對是直的。
直接點說，我有個像女人般的男友；
又或是，我的男友像個女人；
也即是，我男友雖是男兒身，卻有著女孩的性格。
先解剖男友表皮看看：
他愛漂亮，有一雙楚楚可人的淺啡色大眼睛、細緻白滑的皮膚、殺死人的笑容。真的，沒有跨張，我認為他只要戴個假髮，化個淡妝，唔洗痴好似隻醒獅咁既假眼睫毛，亦唔洗戴死魚大眼con，已經靚過好多港女；
更深入，解剖肌肉稍作分析：
他是個一絲不苟、力求完美的人，煮得一手好菜，佢性格唔洗目多講，淨係細心，加埋全部已經無懈可擊。
Ginger就係咁俾佢蒙騙左返來了。
講到呢度，停停先。我相信大家會以為我係死港女，有咁好既男仔，仲要打上黎嘈，你自己咩quali呀，扮上菜等等等等等下刪六萬個有建設性的comments（係，我怕死，更怕人肉獀尋），希望大家理性睇下，我用「蒙騙」係有苦衷的。
首先，任何事都有正反兩面，我唔係話男友係雙面人，但無可否認既係，佢優點就成了佢既缺點。
教下大家中文，什麼是「深層次形容詞」，例子得一串，如下：
細心、一絲不苟、力求完美等形容詞經深層次化後，就是敏感小心眼小事化大大事化更大雞蛋裡挑骨頭麻麻煩煩腌尖腥悶要求多多又高高總之就煩！（唔好意思，加入太多個人情感）
唔睇最上面果段，仲以為我講緊港女。
所以呢個post係勸喻大家，當大家不斷FF男神有幾完美，白馬王子有幾溫柔體貼果時，請將每個形容詞深層次化一下，睇下個結果係咪仲咁值得FF再決定去唔去馬。
就咁講唔夠到肉，俾個例子你評下理：
事緣有日男友黎Ginger屋企，Ginger打算溫柔煮餐飯俾男友食下，體諒下次次都係佢煮，辛苦佢了，係時候要俾我體貼返次。但係男友並沒有用呢個千載難逢既機會好好休息，反而師傅上身，企Ginger隔離「觀察」下......
「Ginger...你切到D牛腩一粒大一粒細既...」
「Baby呀...d上海麪唔好就咁一『住』夾上碗...你可以Z型咁慢慢疊上去...」
「Honey呀...你應該未煮完架可?唔見你加幾粒蔥花加下色既?」
「BB呀...唔係咁架...」「豬仔呀...你聽我講...」
大家細心D應該都睇到，我唔係煮緊法國大餐九大簋，我淥緊個牛腩麫炸！D牛腩o係樓下百佳買架炸！個上海麪係咪o係上海黎我都唔知架！
當然，佢唔會聽到我心入面既吶喊，我亦都唔會聽到佢口中一句句Baby Honey既背後其實心入面係「唔係下話！咁都唔識！我真係好失望，咁低要求都達唔到」，所以當晚晚餐我煮得比平時更難食，原因並唔係我特登發悔氣，而係我有壓力。
之後我都冇再下過廚，唔係我懶，係我怕；之後男友都有扮下野叫我煮，但有一次當我想煮既時候，佢講左句「都係我煮啦，我想食餐好既」...都好，終於露出馬腳，我都唔洗再扮野。
睇到呢度仲會唔會覺得Ginger港女扮上菜？我想表達d咩，你明既。
但係，我衰我會認既，我認我係一個男人的女人...唔夠細心唔夠體貼唔夠力求完美...先襯唔起我男神...
所以，如果我係港，我都會係港男，同我個港女男友仍然係一凹一凸天生一對...哈...哈..................
Ginger
image from:
http://www.repubblica.it/persone/2012/07/24/foto/drag_queen_spezzate_travestimento_e_normalit-39603349/1/
0 comments:
Post a Comment